X’inhuma d-divulgazzjonijiet klimatiċi?
21 ta' April 2023.
Id-divulgazzjonijiet klimatiċi huma dokumenti li organizzazzjonijiet bħal kumpaniji, banek u istituzzjonijiet bħall-BĊE jippubblikaw dwar l-impronta tal-karbonju tal-attivitajiet tagħhom u l-espożizzjonijiet tagħhom għar-riskji klimatiċi. Jgħidulna kemm l-attivitajiet ta’ organizzazzjoni jaffettwaw, u huma affettwati minn, it-tibdil fil-klima
Pereżempju, d-divulgazzjonijiet klimatiċi jistgħu juru kemm jipproduċu CO2 il-fabbriki ta’ kumpanija, l-effett ta’ temp estrem bħal għargħar jew nixfa fuq in-negozju, jew kemm huma ekoloġiċi l-investimenti tagħha. U jistgħu jgħidulna x'tippjana li tagħmel l-organizzazzjoni dwar dan.
Id-divulgazzjonijiet klimatiċi jistgħu jieħdu diversi forom. Jistgħu jiġu rrilaxxati bħala rapport, paġna web jew mezz ieħor ta' komunikazzjoni pubblika.
Kif huma ta' għajnuna d-divulgazzjonijiet klimatiċi?
Bl-għarfien li jġibu, d-divulgazzjonijiet klimatiċi jgħinuna nieħdu deċiżjonijiet infurmati aħjar. Hekk kif it-tikketti tan-nutrizzjoni fuq l-ikel jgħinu lin-nies jagħmlu għażliet aktar tajbin għas-saħħa, id-divulgazzjonijiet klimatiċi jindikaw għażliet aktar ekoloġiċi meta nixtru jew ninvestu. Jekk ilkoll nibbażaw id-deċiżjonijiet tagħna fuqhom, aktar flus se jidħlu f’attivitajiet u teknoloġiji li jgħinu lill-ekonomija tagħna ssir aktar ekoloġika.
Id-divulgazzjonijiet klimatiċi jagħtu wkoll lin-nies stampa aħjar tar-riskji li meta jinnegozjaw ma’ ċerti kumpaniji jew banek. Pereżempju, ditta b'emissjonijiet għoljin ta' gassijiet serra tista' tiltaqa' ma' diffikultà jekk politiki ġodda dwar il-klima jġiegħluha tibdel il-prattiki kummerċjali tagħha.
Il-kumpanija tista’ titlef in-negozju jew saħansitra jkollha tagħlaq, speċjalment jekk ma jkollhiex strateġija soda biex tnaqqas l-emissjonijiet tal-karbonju tagħha jew tlaħħaq mal-impatt tal-klima li qed tinbidel. Kull min għandu ishma f'dik il-kumpanija jew ikun taha self jista' jitlef ħafna flus. Xi investituri u banek jistgħu jkunu kapaċi jġorru dan it-telf, iżda mhux kollha. Għalhekk, ir-riskji klimatiċi jistgħu jwasslu għal problemi u instabbiltà fl-ekonomija usa'.
Għaliex id-divulgazzjonijiet klimatiċi huma importanti għall-BĊE?
Bħala bank ċentrali, huwa xogħolna li nżommu għajnejna fuq ir-riskji. Irridu nifhmu minn fejn jiġu r-riskji tal-klima, l-impatt potenzjali tagħhom u x’se jsir biex jiġu indirizzati. L-informazzjoni mid-divulgazzjonijiet klimatiċi tista’ tagħmel l-analiżi tagħna aktar preċiża u affidabbli. U fuq dik il-bażi, nistgħu nieħdu d-deċiżjonijiet it-tajba biex ngħinu biex inżommu l-munita tagħna u s-sistema finanzjarja stabbli.
Bħala superviżur bankarju, aħna nitolbu lill-banek jibqgħu konxji tar-riskji relatati mal-klima. U ninsistu li jkunu trasparenti dwar l-espożizzjoni tagħhom għal dawk ir-riskji, speċjalment f'industriji li jużaw ħafna karbonju (bħal kostruzzjoni jew tessuti) u żoni suxxettibbli għal diżastri klimatiċi.
Pereżempju, il-banek għandhom jiġbru u jippubblikaw informazzjoni dwar l-emissjonijiet tal-kumpaniji li jagħtuhom self. Għandhom ikunu miftuħa wkoll dwar il-passi li qed jieħdu biex in-negozju tagħhom ikun ekoloġiku u, b'hekk, biex itaffi t-tranżizzjoni għal ekonomija aktar sostenibbli.
Din l-informazzjoni ġdida kollha se titfa’ dawl fuq l-ispejjeż moħbija tar-riskji klimatiċi.
Id-divulgazzjonijiet klimatiċi tagħna stess
Il-BĊE u l-banek ċentrali taż-żona tal-euro (magħrufa kollettivament bħala l-Eurosistema) jippubblikaw ukoll informazzjoni dwar l-impronta tal-karbonju tagħhom u kif qed jippjanaw li jnaqqsuh. Fil-BĊE, nuru fid-Dikjarazzjoni Ambjentali annwali tagħna kif qed nippruvaw nagħmlu l-operazzjonijiet tan-negozju tagħna aktar ekoloġiċi. Pereżempju, qed nużaw inqas elettriku u nnaqqsu l-emissjonijiet mill-ivvjaġġar tan-negozju.
F'Marzu 2023 ppubblikajna informazzjoni dwar il-klima dwar xi wħud mill-assi tagħna – inklużi bonds korporattivi mixtrija bħala parti mill-politika monetarja tagħna – għall-ewwel darba. U l-banek ċentrali individwali tal-Eurosistema jippubblikaw ukoll informazzjoni dwar l-impronta tal-karbonju tal-investimenti l-oħra tagħhom, bħall-fondi tal-pensjonijiet.
Nagħmlu d-divulgazzjonijiet klimatiċi paragunabbli
Il-mod kif inkejlu u niżvelaw ir-riskji tal-klima għandu jsegwi sett komuni ta' regoli.
Għal stampa ċara, jeħtieġ li nkunu kapaċi nqabblu d-divulgazzjonijiet klimatiċi fost tipi differenti ta’ organizzazzjonijiet, u idealment anki fost pajjiżi. U rridu nkunu nistgħu nafdaw li l-informazzjoni hija sinifikanti u affidabbli. Hekk biss issir utli, li jippermettilna nagħmlu għażliet li jgħinu biex niġġestixxu aħjar ir-riskji tal-klima u nħaddmu l-ekonomija tagħna.
Id-divulgazzjonijiet klimatiċi għalhekk ikunu meħtieġa legalment mill-banek u l-kumpaniji kollha. Xi wħud minn dawn l-istandards komuni diġà jeżistu u dalwaqt se jkunu vinkolanti, pereżempju, id-Direttiva tal-UE dwar ir-Rappurtar tas-Sostenibbiltà Korporattiva.
Fil-livell internazzjonali, il-Bord għall-Istandards Internazzjonali tas-Sostenibbiltà qed jaħdem fuq standards li japplikaw lil hinn mill-Ewropa u jagħmlu d-divulgazzjonijiet aktar faċli biex jitqabblu bejn il-pajjiżi.