Il-politika monetarja, l-istabbiltà finanzjarja u r-reviżjoni tal-istrateġija

Is-sistema finanzjarja hija importanti

Is-sistema finanzjarja hija parti ewlenija tal-ekonomija tagħna. Dan jinkludi, pereżempju, il-banek, il-kumpaniji tal-assigurazzjoni u s-swieq finanzjarji. Is-sistema finanzjarja tgħin fiċ-ċirkolazzjoni tal-flus fl-ekonomija meta u lejn fejn ikun meħtieġ. Sabiex din il-funzjoni essenzjali taħdem tajjeb, għandna bżonn li s-sistema finanzjarja tkun stabbli. Filwaqt li awtoritajiet oħra huma primarjament responsabbli għal dan il-kompitu, aħna wkoll noqogħdu attenti għall-istabbiltà ta’ din is-sistema.

L-istabbiltà finanzjarja hija tajba għall-istabbiltà tal-prezzijiet, u viċi versa

Xogħolna hu li nżommu l-prezzijiet stabbli. Nagħmlu dan billi nużaw il-politika monetarja tagħna, li taħdem permezz tas-sistema finanzjarja. Meta l-banek u s-swieq jibqgħu b’saħħithom, il-politika monetarja tagħna taħdem aħjar. Fi żminijiet ta’ instabilità finanzjarja, isir aktar diffiċli għalina biex inżommu l-prezzijiet stabbli. L-istabbiltà tal-prezzijiet hija tajba għas-sistema finanzjarja. In-nies u n-negozji huma aktar kapaċi jippjanaw u jinvestu fl-għarfien li l-prezzijiet mhux se jinbidlu ħafna maż-żmien.

L-impatt tal-kriżi finanzjarja tal-2008

Il-kriżi finanzjarja fl-2008 uriet kemm hija importanti sistema finanzjarja stabbli. Il-kriżi fixklet il-fluss tal-flus madwar l-ekonomija. Is-swieq finanzjarji saru instabbli ħafna. Kien diffiċli ħafna li tissellef il-flus, u n-nies u n-negozji batew ħafna. Biex ngħinu biex il-prezzijiet jinżammu stabbli, naqqasna r-rati tal-imgħax tagħna u bdejna nintroduċu għodod ġodda. Dawn id-deċiżjonijiet, flimkien ma’ dawk ta’ dawk oħrajn li jfasslu l-politika, għenu biex l-ekonomija u s-sistema finanzjarja jerġgħu jaqbdu t-triq it-tajba.

Billi naġġustawi r-rati tal-imgħax, nistgħu ninfluwenzaw il-prezzijiet.

Il-politika monetarja tilħaq lin-nies, lin-negozji u l-Gvernijiet permezz tas-sistema finanzjarja. Billi naġġustaw ir-rati tal-imgħax tagħna, pereżempju, nistgħu ninfluwenzaw kemm ikun għoli għan-nies u n-negozji biex jissellfu l-flus mill-banek. Dan jaffettwa kemm in-nies u n-negozji jonfqu u jinvestu. Dan, min-naħa tiegħu, jinfluwenza kemm l-affarijiet jiswew fl-ekonomija.

Rati tal-imgħax baxxi ħafna u stabbiltà finanzjarja

Xi kultant is-sistema finanzjarja u l-politika monetarja jistgħu jaffettwaw lil xulxin b’modi mhux mixtieqa. Il-każ ta’ rati baxxi ħafna huwa eżempju tajjeb. Rati tal-imgħax baxxi ħafna jkunu ta’ għajnuna għall-istabbiltà tal-prezzijiet meta l-ekonomija tkun sejra ħażin. Dan kien il-każ f’dawn l-aħħar snin. Madankollu, ir-rati tal-imgħax li huma baxxi wisq għal żmien twil wisq ikollhom effetti sekondarji mhux intenzjonati għall-istabbiltà finanzjarja.

Rati baxxi ta’ imgħax ħafna jistgħu jħeġġu lil xi nies u negozji biex jagħmlu aktar dejn milli jifilħu. Il-banek ma jibqgħux jaqilgħu daqstant meta jselfu. Dawk li jfaddlu ma tantx jagħmlu qligħ mit-tfaddil tagħhom. In-nies u n-negozji jistgħu jieħdu deċiżjonijiet aktar riskjużi. B’riżultat ta’ dan, is-sistema finanzjarja tista’ ssir aktar instabbli.

Aħna nżommu għajnejna fuq l-effetti sekondarji

Aħna qed noqogħdu attenti għal kwalunkwe effett sekondarju mhux mixtieq tal-politika monetarja tagħna. Filwaqt li r-regoli minn awtoritajiet oħra li jinkoraġġixxu mġiba responsabbli fis-swieq finanzjarji huma r-rispons ewlieni, aħna naġġustaw ukoll xi wħud mill-għodod tagħna biex inżommu l-effetti sekondarji żgħar.

Kollox ma’ kollox, l-effetti sekondarji mhux mixtieqa ġew ikkumpensati minn oħrajn tajbin. Pereżempju, il-banek jistgħu jaqilgħu inqas issa mis-self tal-flus. Iżda l-politika monetarja tagħna tgħin ukoll lill-banek għax tistabbilizza l-ekonomija. Dan jżomm lin-nies f’impjieg, jippermettilhom iħallsu lura s-self tagħhom lill-banek jew li jisselfu mill-ġdid.

Ir-regoli huma l-ewwel linja ta’ difiża

Awtoritajiet oħra huma responsabbli biex jiżguraw l-istabbiltà finanzjarja fiż-żona tal-euro. Ir-regoli tagħhom li jippromwovu sistema finanzjarja aktar stabbli huma l-ewwel linja ta’ difiża kontra r-riskju ta’ kriżi finanzjarja oħra.

Żewġ naħat tal-istess munita

Iżda hemm ukoll każ ċar biex tiġi kkunsidrata l-istabbiltà finanzjarja meta nieħdu d-deċiżjonijiet tagħna dwar il-politika monetarja. Dan għaliex il-kriżijiet finanzjarji jistgħu jipperikolaw l-istabbiltà tal-prezzijiet. L-istabbiltà finanzjarja u l-istabbiltà tal-prezzijiet huma żewġ naħat tal-istess munita. Dejjem għandna bżonn inżommu f’moħħna ż-żewġ naħat. Huwa għalhekk li l-informazzjoni dwar is-sistema finanzjarja dejjem għandha rwol importanti fl-analiżi u d-deċiżjonijiet tagħna.